明明係我嘅生日，點解會俾小小豬捉左入海洋公園，嚟左一個爆汗暴晒攰爆嘅慶祝活動？
其實係因為小小豬記得生日入場係免費，咁加埋學校之前送俾佢嘅獎勵『一張學生飛』，就可以嚟免費兩母子嚟玩返日。其實咁熱嚟都真係有點……，不過過多幾年大個仔有自己生活圈子，到時叫佢陪我玩都應該難過登天，亦有可能連我生日都唔記得，所以就順下佢意，同時亦都珍惜佢仲係貼身膏藥嘅時刻。
可能仲係暑假關係，所以尋日入場都算多人，好多機動遊戲都大排隊，原本我地都打算嚟轉最後的"滑浪飛船"，不過要等成90分鐘以上，我地都唯有放棄。諗住買飛俾小小豬再去玩探索號R，點知今日又休館，所以我地主要都係入啲館睇下動物hea遊一返。
其實次次嚟睇動物都係差唔多，但每次小小豬都係睇好耐先肯走，真係….有冇咁鐘意睇呢？不過鐘意動物都係一件好事，所以媽媽我就只好乖乖企定定，涼住冷氣等佢啦…哈哈哈~
Search